عجبى ............. مجموعة من رباعيات صلاح جاهين

على رجلى دم ، نظرت له ما احتملت
على ايدى دم ، سألت: ليه؟ لما وصلت
على كتفى دم وحتى على راسى دم
أنا كلى دم أقتلت؟؟ ولا اتقتلت؟؟
عجبى !!!!!

أنا كل يوم أسمع فلان عذبوه
أسرح فى بغداد والجزاير وأتوه
ما اعجبش من اللى يطيق بجسمه العذاب
واعجب من اللى يطيق يعذب أخوه
عجبى !!!!!

وقفت بين شطين على قنطرة
الكدب فين والصدق فين يا ترى؟
محتار أموت ، الحوت خرج لى وقال
هوا الكلام يتقاس بالمسطرة؟
عجبى !!!!!

عينى رأَت مولود على كتف أُمه
يصرُخ تهنِّن فيه يصرخ تضمُّه
يصرخ تقول يا بْنى ما تنطق كلام
ده اللى ما يتكلمش يا كتر همُّه
عجبى!!!!!

أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي !!

يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي !!