مطبخ رمضاني جدا (طريقة عمل الكنافة بالبسبوسة )

المقادير/

1\4 كيلو كنافه
2كوب سمنه سايحه
1/2 كوب سكر بودره

الطريقه
نجيب الكنافه ونقطعها حتت صغيره اوىىىىىىىى
وبعدين نكون مسيحين السمنه ونحطها عليها ونشربهالها كويس اوى ولو لقتيها محتاجه سمنه تانى حطى
دى بتختلف من حد للتانى
وبعدين حطى السكر البودره وقلبيه كويس اوى فيها ولو حباها مسكره اكتر زودى دى حاجه ترجعلك
بعد كده هاتى صينيه متوسطه وادهنيها بشويه سمنه وعليها رشه دقيق
وحطى الكنافه فيها واضغطى عليها كويس اوى اوى مهمه جدا النقطه دى
بعد كده حطى عليها باقى السمنه على الوش ودخليها الفرن تستوى على نار منوسطه 200 درجه
لحد ماتستوى وطلعيها من الفرن واقلبيها واسقيها شويه شربات بس مش كتير

نيجى للبسبوسه
المقادير
كيس بسبوسه
علبه زبادى
معلقه شاى بيكنج بودر
1/3 كوب سمنه او زيت
الطريقه
نخلط كل المكونات مع بعض كويس اوى لحد ما العجينه تبقى ماسكه فى ايدينا ولكن تبقى طريه شويه وتعالى حطاها على الكنافه وافرديها كويس فى الصينيه وزوقيها زى ما تحبى انا حطيت سودانى ولوز وبندق
وحطيها فى الفرن على نفس درجه الحراره وهو طبعا هيكون سخن لاننا لسه مطلعين منه الكنافه
وسيبيها نصف ساعه ولما وشها يحمر خرجيهاواطفى النار واسقيها باقى الشربات ودخليها الفرن تانى وسيبيها تبرد
فيه وبعد ما تبرد قطعيها وممكن تحطى عليها كريم شا نتيه او قشطه زى ما تحبى

بس ياستى
لو عاوزه الشربات كمان اهو
2 كوب سكر على2 كوب ميه وعصير 1/2 ليمونه وحطيهم على النار لحد قبل ما يعقد
يعنى اول ما تشوفى الرغاوى بقت دهبى طفى عليه وسيبيه يبرد

ودلوقتى ده طبقين بالهنا والشفا لاول فتوكتين حلوين هيخوشوا يقيموا ويقولولى رايهم ايه